أوزوريس بالمختصر المفيد

أوزوريس هو الإله اللي اتولد مرتين واللي قصته تشبه بالتقريب دورة حياة الإنسان لما بيتولد ويموت ويعيش بعد كدة حياته سواء ف الجنة أو النار وهثبتلك صحة وجهة النظر .دي كمان شوية كمل قراية بس

إله الزراعة و العالم الأخر للمصريين القدماء. أوزورس

المهم ياسيدي إن (أوزوريس) كان ف الأول حاكم مصر وإله الزراعة والخصوبة وكان دايما بيتصور باللون الأخضر قال يعني عشان إله الزراعة وكدة لحد ما حصلت الأسطورة الأشهر ف الميثولوجيا المصرية والأقرب لقلبي شخصياً وهي أسطورة (أوزوريس و أيزيس) وشقلبت الدنيا.

زي ما قولنا قبل كدة يمعلم لو تفتكر إن (أوزوريس) كان دايما مكروه من أخوه (سِت) إله القوي الشريرة ، وف يوم (سِت) عمل مؤامرة ضد أخوه (أوزوريس) ودعاه لمجلس كدة عامله هو وأتباعه، المهم ياسيدي ف المجلس (سِت) كان محضر تابوت علي مقاس أخوه ويقال إنه قال يعني عمل مسابقة يشوف جسم مين هيكون علي مقاس التابوت بالظبط وياخده هدية ولما جه دور صاحبنا (أوزوريس) واسمحولي اقول صاحبنا ماهو بقا عِشرة قديمة خلاص راح (سِت) وأتباعه قافلين التابوت ب إحكام ورموه ف النهر.

وعلي طول أخته ومراته المخلصة (أيزيس) بمساعدة أختهم (نفتيس) قدروا يعرفوا بموضوع المؤامرة ووصلوا كمان للتابوت بعد ما المياه جرفته لحد بابليون ورجعوا بيه علي حتة ف الدلتا إسمها بوتو موجودة دلوقتي عند حبايبنا ف كفر الشيخ، وهناك قدر (أوزوريس و أيزيس) أنهم يخلقوا أو يخلفوا ابنهم (حورس) بس يا فرحه ما تمت (سِت) عرف مكان أخوه وقرر أنه يتخلص منه نهائي المرادي وراحله وقطعه لحوالي 14 قطعة أو اكتر حسب الروايات.

وزي ما بيتقال وراء كل رجل عظيم امرأة ما بالك بقا لو كان الرجل دة (أوزوريس) والمرأة دي هي (أيزيس) اللي قدرت بسحرها أنها تجمع أجزاء جوزها تاني وترجعه للحياه مش قولتلك زي دورة حياة الإنسان ومصدقتنيش بس ياسيدي وراحوا عاملين قعدة عرب كدة بين الألهه وصدر الحكم بأن (أوزوريس) يرجع تاني ملك مصر بس هو ساب المكان دة (لحورس) وقال كفاية عليا مرمطة لحد كدة وهكون إله العالم السفلي وإله الموتي أهو لا حد يعملي مؤامرات ولا حد يقطعني وانت ياحورس يابني حارب عمك (سِت) بقا انا تعبت خلاص ومن هنا بدأ (أوزوريس) حكمه ف مكانه الجديد.
_______________________________________________________________________
كاتب المقال/ #محمد_خالد_أبوطالب